La voucacioun dóu Couleitiéu Prouvènço es d’apara, perpetua, espandi e proumòure la culturo prouvençalo à travès sa lengo, si coustumo e si tradicioun, tout acò anant coutrìo emé la moudernita, e ’mé coume óutis principau l’Óusservatòri de la Lengo e de la Culturo Prouvençalo.

Aquesto assouciacioun Lèi 1901 recampo ciéutadan, assouciacioun, coumuno de Prouvènço, dins un mouvemen couleitiéu pèr enaura nosto richesso culturalo e patrimounialo.

• Despièi sa creacioun en 2000, lou Couleitiéu Prouvènço multiplico lis acioun pèr la proumoucioun de la culturo prouvençalo e la recouneissènço de la lengo prouvençalo coume lengo de Franço.

Redacioun de la Charto « O pèr la lengo e la culturo prouvençalo ». Signado en 2020 pèr 120 candidat is eleicioun municipalo, qu’a pèr titre « Ma vilo s’engajo s’engajo pèr Prouvènço ! » despièi lis eleicioun municipalo de 2020, engajo aquéli que l’an signado à travaia pèr l’aparamen e la proumoucioun dóu patrimòni nostre.

Aquesto charto es atualisado de-longo segound li nouvèllis afihacioun e li nouvèllis acioun de l’assouciacioun.

La mai impourtanto es aquelo de la couourdinacioun « Gardaren Prouvènço ! », en Arle en 2015, à la sousto dóu Couleitiéu Prouvènço, de La Counfrarié di Gardian e de L’Unioun Prouvençalo. Recampè 10 000 manifestant vengu de touto la Prouvènço, 300 assouciacioun e 100 elegi. Aquesto manifestacioun s’endevèn em’uno tiero d’àutris iniciativo militanto menado despièi la creacioun de l’assouciacioun (vèire Istouri dóu mouvemen).

• Festenau Me Dison Prouvènço, Festenau di Font, festenau Li Tiatralo en Luberoun…
• Forum dis Assouciacioun de Culturo e de Tradicioun Prouvençalo (de 2013 à 2017) dins la coumuno de Maussano-lis-Aupiho.
• Forum de Desèume, à Sant-Martin-de-Crau (en 2018, 2019 e 2021).
• Assiso di lengo e culturo regiounalo au Doumaine de l’Estang de Desèume, à Sant-Martin-de-Crau (2024).
• Espousicioun e counferènci à l’Óusservatòri de la lengo e de la culturo prouvençalo.

• Revisto trimestrialo bilengo Me Dison Prouvènço.
• Edicioun de libre, pèr la majo-part bilengo, qu’ajudon à descurbi la lengo prouvençalo e que soun tambèn un suport de proumoucioun de la culturo, di tradicioun e de l’istòri de Prouvènço : Sant & Or : un drapèu éuroupen pèr Prouvènço ; Musico Nostro : quàuqui figuro majouralo de musician prouvençau : Pastriho : óumage i pastre prouvençau ; La Poulido de Gemo ; Li Bouscarlo (recuei de reproubèrbi prouvençau); Guy Bonnet, la Provence au cœur (autoubiougrafìo dóu cantaire, coumpousitour) ; Sinbad lou marin ; A la descuberto dóu prouvençau, lengo regiounalo, lengo amenaçado (pèr lou soucioulenguisto Felipe Blanchet) ; Mirèio, un rêve de Mistral (pèço de tiatre de Girard Gelas).
• Edicioun d’óubrage pèr l’aprendissage de la lengo prouvençalo : Lou Coupier, diciounàri francés / prouvençau ; Lou Diciounàri di Rimo Prouvençalo. Aprene lou prouvençau (imagié audioulibre pèr lis escoulan de meirenalo).
• Bando dessinado en prouvençau : l’album Gaspar de Besso; reviraduro dis Album dis Aventuro de Tintin, Li 7 Boulo de Cristau, Lou Tèmple dóu Soulèu e Li Beloio de la Castafioro. Edicioun d’un « manga » en prouvençau (en próujèt).

Lou Couleitiéu Prouvènço, à l’óurigino dóu próujèt, beilejo despièi 2020 aquéu cèntre culturau qu’a planta caviho au Mas Sant-Pau, sus la coumuno de Chivau-Blanc (84). Coumpren un espàci d’espousicioun e de prougramacioun de counferènci, uno biblioutèco e uno boutigo-librarié.

La Biblioutèco Jan-Pèire Tennevin es un cèntre de ressourso que comto un founs doucumentàri de mai de 2 500 referènci, que s’enrichis de-longo. Uno assouciacioun fuguè signado emé la BnF (Biblioutèco naciounalo de Franço) pèr mena un travai de numerisacioun di manuscri e dis empremi en lengo prouvençalo, ço que permet soun aparamen e un mai grand espandimen, majamen de-vers de cercaire e d’universitàri.

• Recouneissènço pèr l’Estat dóu prouvençau coume lengo de Franço
• Federa e realisa un maiun coumplèt dis atour dóu païs (entre-presso, couleitiveta, assouciacioun) que represènton la culturo nostro, à l’entour de nosto identita.
• Faire de l’Óusservatòri de la lengo e de la culturo prouvençalo un atour de la culturo, de la lengo e di tradicioun prouvençalo que se poudra pas faire sènso.
• Espandi, coutrìo emé lis Acadèmi de la regioun e lou Menistèri de l’Educacioun naciounalo, un prougramo d’inciacioun au prouvençau dins lis escolo de Prouvènço, em’à la fin la creacioun d’un CAPES de lengo especifi au territòri nostre (prouvençau, gavot, niçard).

• Se recampa à l’entour de l’amour de la Prouvènço e de si valour.
• Deveni sòci d’uno assouciacioun pleno d’enavans qu’enauro lou patrimòni prouvençau, à travès sa lengo e sa culturo.
• Adurre sa pèiro pèr gagna à nòstis idèio li catau e permetre de bouta en plaço de grand proujèt pèr li Prouvençau.
• Participa à nòstis evenimen culturau e nòsti fèsto en aproufichant de tarifo de proumoucioun.

Dóumaci vosto ajudo, poudèn douna mai d’envanc à nòstis acioun e sensibilisa nòsti decidaire. Vuei, pèr federa e deveni uno regioun fièro de soun identita culturalo, emé sa lengo enfin recouneigudo pèr l’Estat, avèn besoun de vous :

Afihas-vous au Couleitiéu Prouvènço !