Un mas patrimouniau entre Aupiho e Leberoun
Es lou Mas Sant-Pau qu’aculis aqueste cèntre culturau prouvençau, mes à dispousicioun pèr la coumuno de Chivau-Blanc. Lou Mas Sant-Pau es un bèl eisèmple de fermo tradiciounalo prouvençalo de la plano. Aquéu mas famihau es de la fin dóu siècle XVIIIen pèr sa partido la mai anciano. Lis obro de renouvacioun fuguèron finançado pèr la Regioun Prouvènço-Aup-Costo d’Azur, emé l’ajudo d’àutri couleitiveta territourialo pèr ço que toco lis equipamen (despartamen de la Vau-Cluso, di Bouco-dóu-Rose, e tambèn de coumuno noumbrouso) e’mé l’ajudo di ciéutadan via la Foundacioun dóu Patrimòni, e dóu mecenas (Foundacioun d’Entre-presso dóu Crèdi Agricolo Aup-Prouvènço, Doumaine de Mejano).
Es lou 24 d’óutobre de 2020 que l’Óusservatòri de la lengo e de la culturo prouvençalo fuguè inagura pèr Jan-Pèire Richard, Presidènt dóu Couleitiéu Prouvènço, en presènci de Renaud Muselier, Presidènt de la Regioun Prouvènço-Aup-Costo d’Azur, de Crestian Mounier, Conse de Chivau-Blanc, de Maurise Chabert, Presidènt dóu Counsèu despartamentau de la Vau-Cluso, de Bruno Genzana, Souto-presidènt dóu Counsèu despartamentau di Bouco-dóu-Rose, de Miquèlo Ricard, prouprietàri dóu Doumaine de Mejano e Franck Alexandre, Presidènt de la Foundacioun d’entre-presso dóu Crèdi Agricolo Aup-Prouvènço, davans un fube d’elegi e representant d’assouciacioun de culturo prouvençalo.
L’Óusservatòri de la lengo e de la culturo prouvençalo es la resulto dóu travai dóu Couleitiéu Prouvènço, que fuguè à l’iniciativo dóu proujèt i’a mai de dès an d’acò e cepoun de sa realisacioun. Lou Couleitiéu Prouvènço a mes dedins tóuti si dardèno e sis ajudo bountouso pèr que siegue realisa aquest ourganisme culturau.
L’Óusservatòri de la lengo e de la culturo prouvençalo es tras-que bèn situa, dins lou Pargue Naturau Regiounau dóu Leberoun e pas liuen d’aquéu dis Aupiho, es proun eisa de ié veni dóumaci la sourtido proche de l’autourouto A7 via lou pont tout nouvèu qu’escambarlo Durènço à Cavaioun.
Lou Mas Sant-Pau, lega pèr Pauleto
Dóumaci lis enfourmacioun que Lucian Calvière, Presidènt de l’assouciacioun de Castèu-Reinard l’Escolo Felibrenco Marius Chabran nous baiè, n’en sabèn ’n pau mai sus la rèiro prouprietàri dóu Mas Sant-Pau, bello Coumtadino que devenguè coumtesso de pèr soun maridage. Nascudo Paulo Marìo Claro Mignucci lou 13 de Mars de 1905, à Marsiho, èro la chato de Moussu e Madamo Mignucci (lou noum de jouino fiho de sa maire èro Liens). Dins sa famiho, ié disien emé tendresso Pauleto.
Fasié partido de la darriero generacioun que tenié lou prouvençau dóu brès. Soun maridage emé lou Comte Gui Emilo Jan Truitié de Vaucresson, que davalavo d’uno lignado d’óuficié de l’armado, l’empachara pas de resta touto sa vido estacado i coustumo de sa Prouvènço, enjusqu’à sa mort lou 28 de Jun de 1988.
Coume avié ges de descendènt en lignado dirèito, baiè lou Mas Sant-Pau à la coumuno, dins l’idèio de crea un oustau de retirado, un biais de moustra soun estacamen à Chivau-Blanc. Mai coume lou proujèt d’oustau de retirado èro dejà engaja autro-part, emé lis eiritié fuguè di que lou Mas Sant-Pau sarié pèr uno bono obro toucant la culturo. Es ansin que lou conse de Chivau-Blanc, Crestian Mounier, emé l’acord de soun Counsèu Municipau, fuguè bèn dispausa pèr aculi dins aquest endré l’Óusservatòri de la Lengo e de la Culturo Prouvençalo.
